ܫܒܚܘ ܠܡܪܝܐ ܬܫܒܘܚܬܐ ܚܕܬܐ ܡܛܘܠ ܕܬܕܡܘܪܬܐ ܥܒܕ ܦܪܩܬܗ ܝܡܝܢܗ ܘܕܪܥܗ ܩܕܝܫܐ 1
ܚܘܝ ܡܪܝܐ ܦܘܪܩܢܗ ܘܠܥܝܢ ܥܡ̈ܡܐ ܓܠܐ ܙܕܝܩܘܬܗ 2
ܐܬܕܟܪ ܛܝܒܘܬܗ ܘܗܝܡܢܘܬܗ ܠܕܒܝܬ ܐܝܣܪܝܠ ܘܚܙܘ ܟܠܗܘܢ ܥܒܪ̈ܝܗ̇ ܕܐܪܥܐ ܦܘܪܩܢܗ ܕܐܠܗܢ 3
ܫܒܚܘ ܠܡܪܝܐ ܟܠܗ̇ ܐܪܥܐ ܐܬܦܨܚܘ ܘܙܡܪܘ ܘܫܒܚܘ 4
ܙܡܪܘ ܠܡܪܝܐ ܒܟܢܪ̈ܐ ܘܒܩܠܐ ܕܙܡܪܐ 5
ܘܒܩܠܐ ܕܩܪ̈ܢܬܐ ܫܒܚܘ ܩܕܡ ܡܠܟܐ ܡܪܝܐ 6
ܢܙܘܥ ܝܡܐ ܒܡܠܐܗ ܬܒܝܠ ܘܥܡܘܪ̈ܝܗ̇ 7
ܢܗܪ̈ܘܬܐ ܢܩܫܘܢ ܟܦܐ ܐܟܚܕܐ ܘܛܘܪ̈ܐ ܢܫܒܚܘܢ 8
ܩܕܡ ܡܪܝܐ ܕܐܬܐ ܠܡܕܢܗ̇ ܠܐܪܥܐ ܕܐܢ ܬܒܝܠ ܒܙܕܝܩܘܬܐ ܘܠܥܡ̈ܡܐ ܒܬܪܝܨܘܬܐ 9